Na Brand & Plundering
CCN Verslaggewing
Atlantis:- Nege verdagtes tussen die ouderdomme van 18 en 25 is Donderdago, 16 April 2026, by die Covid-informele nedersetting in hegtenis geneem op aanklagte van diefstal en die besit van gesteelde eiendom.
Die inhegtenisnemings volg ná ’n voorval Woensdagaand waartydens ’n vragmotor naby John Dreyerweg aan die brand gesteek is. Lede van Openbare Orde Polisie (POP) is ontplooi om die situasie te monitor.
Volgens berigte het die beamptes te voet na die toneel beweeg toe hulle die verdagtes gewaar het wat bokse met platskerm-televisies dra. Toe die polisie hulle nader, is hulle deur die groep met klippe bestook.
Die beamptes het egter daarin geslaag om die aanval af te weer en nege manlike verdagtes in hegtenis te neem. Altesaam 17 televisiestelle is van die verdagtes teruggevind.
Die verdagtes sal, sodra hulle aangekla is, hul eerste verskyning in die Atlantis Landdroshof maak.
