NCC-raadslid Yunnah Stevens slaan hard toe op Saldanhabaai se “skandelike” R7,7 miljard-begroting.
George C April -CCN Verslaggewer & NCC Hopefield Kandidaat November . 4. 2026
Werkloosheid, armoede en verwaarlosing tref Hopefield hard terwyl die munisipaliteit se begroting minderbevoorregte gemeenskappe in die steek laat, sê Yunnah Stevens en plaaslike inwoners.
HOPEFIELD:- Die inwoners van Hopefield ly onder ’n ernstige werkloosheidkrisis, groeiende armoede en verouderde infrastruktuur, en die Saldanhabaai Munisipaliteit (SBM) se pas goedgekeurde R7,7 miljard 3 – jaar begroting doen bitter min om dit te verlig.
Dit is die harde boodskap van PR-raadslid Yunnah Stevens van die National Coloured Congress (NCC) in haar onlangse live video, waar sy die begroting as ’n morele en praktiese mislukking vir die armes afgemaak het.
Stevens het spesifiek op die lot van minderbevoorregte gemeenskappe soos Hopefield gefokus. Sy het gevra hoe ’n munisipaliteit kan voortgaan om groot bedrae aan infrastruktuur in groter sentra te bestee, terwyl mense op hierdie dorp sukkel om werk te kry, huise te bou en basiese dienste te ontvang. “Dit is skandalig,” het sy in wese gestel, terwyl sy die begroting se gebrek aan werklike verligting vir die kwesbares uitgewys het.
Hopefield se pyn: Werkloosheid en lyding.
Hopefield, een van die oudste dorpe aan die Weskus, verkeer in ’n diep krisis. Werkloosheid is rampagtig hoog, met talle gesinne wat daagliks sukkel om kos op die tafel te sit. Inwoners met wie gepraat is, vertel van jong mense wat sonder hoop is, gesinne wat in informele strukture woon, en ’n gebrek aan ekonomiese geleenthede wat die dorp al jare lank teister.
Tussen Mei en Junie het hierdie ontevredenheid oorgekook. Baie inwoners beskryf die begrotingstoewysings vir Hopefield as “skandelike” en voel dat die munisipaliteit hulle doelbewus aan die agterkant hou.
“Ons word weer eens vergeet,” is ’n algemene klag. Die begroting misluk om betekenisvolle werkskepping, behuising en infrastruktuur verbeterings te bring, ten spyte van herhaalde beloftes tydens openbare vergaderings.
As NCC-kandidaat vir Hopefield sien ek hierdie lyding elke dag. Ons mense verdien beter. Hulle is nie statistieke nie, hulle is gesinne wat sukkel, ouers wat bekommerd is oor hul kinders se toekoms, en ’n gemeenskap wat al te lank agtergelaat word.
Good Party se steun onder skerp kritiek
’N besondere bron van frustrasie is die Good Party se besluit om die begroting te steun. In die 2021-verkiesing het Good sterk steun op Hopefield geniet, juis omdat hulle belowe het om vir die armes en werkendes te veg. Nou voel inwoners verraai.
“Hulle is veronderstel om vir ons te baklei, maar nou word ons verkoop,” sê verskeie inwoners wat hul ongelukkigheid met die begroting uitgespreek het.
Hierdie kritiek word deur die NCC en Stevens ondersteun. Hoe kan ’n party wat homself as kampvegter vir die minderbevoorregtes bemark, ’n begroting goedkeur wat werkloosheid en armoede in plekke soos Hopefield ignoreer?
Begroting onder die vergrootglas
Die begroting, aangebied deur burgemeester Marius Koen, behels R6,4 miljard vir bedryfsuitgawes en R1,3 miljard vir kapitaalbesteding, met die grootste deel wat na infrastruktuur gaan.
Dit is met 18 stemme teenoor 5 goedgekeur. Opposisiepartye soos die PA, ANC en EFF het dit verwerp weens ontoereikende subsidies vir armes, stadige behuisingsprojekte, hoë tariefverhogings (elektrisiteit met sowat 9,2%) en ’n gebrek aan fokus op sosio-ekonomiese ontwikkeling.
PA-raadslid William Morrison het dit treffend gestel: ’n begroting is ’n morele kompas – en hierdie een wys in die verkeerde rigting vir die armes.
Die werklikheid moet besef word:
Hierdie begroting is nie net syfers op papier nie. Dit het ’n direkte impak op mense se lewens op werklose jeug, enkelouers, en gesinne wat in Hopefield probeer oorleef.
Die NCC, onder leiding van stemme soos Yunnah Stevens, sal aanhou om druk uit te oefen en die administrasie aanspreeklik te hou.
As inwoners van Hopefield en ander minderbevoorregte areas moet ons die werklikheid begin besef: ons kan nie langer op partye staatmaak wat beloftes breek nie.
Stem vir verandering – Word betrokke.
Eis die dienste en geleenthede wat ons verdien.
Die lyding op Hopefield is werklik. Die werkloosheidkrisis is ’n noodgeval. Dis tyd dat die munisipaliteit luister, voordat dit te laat is.
