Strand gemeenskap slaan terug
Berig:- George April
STRAND:-’n Gewapende rooftog laat Sondagaand by McDonald’s naby die Total-vulstasie op die R44 in Strand, het die Helderberg-gemeenskap geruk.
Binne minute was buurtwagte en sekuriteitsmaatskappye op die toneel om te help.
Volgens KC Gericke, voorsitter van die Strand Patrol Buurtwag, het Sierra 47 onmiddellik gereageer toe die alarm afgaan. Kort daarna het verskeie sekuriteitsfirmas soos Vetus Schola, AM Sekuriteit, Fidelity ADT, AMBO, GB Sec en SAPD by die toneel aangesluit.
Een van die nabygeleë besighede se kameras het die vlugtende voertuig op ’n systraat vasgevang. Al was die nommerplaat eers onduidelik, het unieke kenmerke gehelp om die voertuig positief te identifiseer.
Gericke sê dat hulle beheerkamer, met behulp van die Navic LPR-stelsel, die voertuig binne sowat 45 minute kon opspoor. SAPD en McDonald’s se gewapende reaksiespan is onmiddellik in kennis gestel en ’n saaknommer is oopgemaak.
Die voertuig is intussen op Navic gemerk en soektogte is aan die gang.
“Strand is nie meer ’n speelgrond vir misdadigers nie, ons staan saam en dit maak die verskil,” sê Gericke.
Owerhede vra dat enigiemand met inligting na vore kom, die ondersoek duur voort.
