Geen kos”: 15 Jaar Tronkstraf

NOORDKAAP:- ’N man van Upington, Etienne Jijanie (24), is in die Upington Streekshof tot 15 jaar direkte tronkstraf gevonnis vir die poging tot moord op sy 21-jarige vriendinHy is ook ongeskik verklaar om ’n vuurwapen te besit.

Die voorval het op 30 Mei 2025 plaasgevind, nadat Jijanie blykbaar eers  kos van sy vriendin geëis het.  Toe sy sê daar is geen kos beskikbaar nie, het hy verbaal beledigend geraak.  Hy het haar gesê sy moet haar liggaam verkoop sodat hulle kos en sigarette kan koop.

Hy het haar eers met ’n ysterstang aangerand en haar hand gebreek.  Daarna het hy haar herhaaldelik met ’n mes in die bors, rug en arms gesteek.  Sy is ernstig beseer en is dringend na die hospitaal geneem, waar sy die aanval oorleef het.

Jijanie is gearresteer en is met poging tot moord aangekla. Hy het in aanhouding gebly tot die saak afgehandel is. Tydens die pleit- en vonnisverrigtinge het hy skuldig gepleit. Hy het erken dat hy haar herhaaldelik gesteek het en dat hy geweet het sy dade kon tot haar dood lei. Al het hy alkohol gedrink, het hy toegegee dat hy bewus was van wat hy doen. Hy het ook erken dat sy optrede onregmatig was en berou getoon.

Die staat, deur aanklaer Fridel du Plessis, het aangevoer dat die geweldadige en wrede aard van die aanval ’n lang direkte tronkstraf regverdig.  ’N slagoffer-impakverklaring is voorgelê wat die ernstige fisiese, emosionele en sielkundige gevolge vir die vrou beskryf. Die staat het ook die erns van die misdaad en die hoë voorkoms van geslagsgebaseerde geweld in die streek beklemtoon.

Die Nasionale Vervolgingsgesag (NVG) se Noord-Kaapse woordvoerder, Mojalefa Senokoatsane, het gesê die vonnis stuur ’n sterk boodskap dat geweld in intieme verhoudings ernstige gevolge het en dat die regstelsel slagoffers sal beskerm.