Maatskappy Aansoek Verval

 Phelan Green se vroeë sonprojekverslag was onvolledig – proses begin van vooraf.

CCN Verslaggewing

Hopefield:- Die Phelan Green-groep het erken dat die oorspronklike Omvangsbepalingsverslag (Scoping Report) vir die reuse-sonkragkomponent van hul beoogde groen waterstof- en eSAF-projek by Hopefield onvolledig was. Die aansoek het op 24 Augustus 2026 verval, en ’n nuwe aansoek met ’n bygewerkte, meer omvattende verslag moet nou by die nasionale Departement van Bosbou, Visserye en die Omgewing ingedien word. Die departement het bevestig dat die aansoek (verwysingsnommer 14/12/16/3/3/2/2839) wel verval het. Phelan Green sê hulle het doelbewus toegelaat dat die verslag verval, eerder as om ’n onvolledige dokument in te dien, omdat dit nie genoeg besonderhede bevat het vir die plaaslike gemeenskap om ’n ingeligte besluit te neem nie.

“’N nuwe aansoek sal by die Departement ingedien word, vergesel van ’n bygewerkte en meer omvattende Omvangsbepalingsverslag,” het kommunikasiehoof Anthea Abraham gesê. Die maatskappy beplan ook om binnekort ’n toegewyde projekkantoor in Hopefield oop te maak waar inwoners uitstallings kan sien, inligting kan kry en vrae kan vra.

Die sonkragaanleg is ’n kritiese deel van die groter R47 miljard-projek (Fase 1 is R12 miljard). Sonder die sonkrag kan die groen waterstof en eSAF nie “groen” wees nie. Die eSAF/waterstof-aanleg self loop ’n aparte proses by die Wes-Kaapse Departement van Omgewingsake en Ontwikkelingsbeplanning.

Wat Beteken dit vir die Tydlyn?

Alles vir die sonkomponent moet nou van voor af begin: nuwe aansoek, nuwe openbare deelname, nuwe kommentaarperiodes. Dit stoot die vroeëre teiken van konstruksie in vroeg 2027 verder terug.  Ander kritiese lisensies (watergebruik, atmosferiese emissies en omgewingsmagtiging vir die brandstofaanleg) is steeds uitstaande.

Die gemeenskap bly verdeeld.

Baie inwoners, veral in die blanke gemeenskap, is heeltemal teen die projek.  In die kleurlinggemeenskap is daar sterker belangstelling in die beloofde werkgeleenthede (sowat 500 permanente poste). Maar die vraag oor die meer as 500 bestaande werkgeleenthede op plaaslike plase en besighede wat van die skaars water afhang, bly onbeantwoord.  Fase 1 alleen benodig 2 megaliter water per dag.

Inwoners sê die maatskappy se erkenning dat die vorige verslag onvolledig was, is ’n stap in die regte rigting.  Maar hulle wil sien dat die nuwe proses werklik deursigtig is, met openbare vergaderings in Hopefield self, en duidelike antwoorde op die water- en bestaande-werk-kwessies.

CCN het kommentaar by die Departement van Bosbou, Visserye en die Omgewing, die Wes-Kaapse DEA&DP en Saldanhabaai Munisipaliteit aangevra.

Hul antwoorde sal gepubliseer word wanneer dit ontvang word.