Boland Rugby Unie onder druk om te reageer
Berig:- George April
HOPEFIELD: Die strate van die Weskus gons met gesprekke oor die omstrede skeidsregterbesluite tydens die Boland Rugby Unie-wedstryd tussen Hopefield en Paternoster wat Saterdag plaasgevind het.
Die gemeenskap, sowel as ondersteuners, vra vir verantwoordelikheid van die Boland Rugby Unie, aangesien daar ‘n algemene gevoel is dat die skeidsregter se besluite die uitslag van die wedstryd in ‘n groot mate beïnvloed het.
Cape Coast News (CCN) het amptelik met Kobus Vigitini van die Boland Rugby Unie gekontak, en sal sy reaksie publiseer indien hy besluit om die saak aan te spreek. Die stilte van die Unie tot dusver het net verdere frustrasie veroorsaak. Dis tyd dat Linston Manual wat in beheer is van Skeidsregters, aangespreek moet word…
‘n Omstrede Finale Kwartier
Die drama het in die laaste kwart van die wedstryd ontvou toe die tuisspan, Hopefield, ‘n drukspel aan die gang gesit het en oënskynlik oor die doellyn gegaan het om ‘n vyf punte te behaal. Maar tot groot ongeloof van die spelers en ondersteuners, het die skeidsregter die drie verwerp en Hopefield eerder ‘n strafskop toegeken, ‘n besluit wat ‘n groot impak op die eindresultaat gehad het.
Hopefield het nie opgegee nie, en het vinnig ‘n tikskop uitgevoer, wat vinnig gevolg is deur ‘n speler wat oor die drielyn duik. Hierdie keer het diegrensregter opgegaan en die skeidsregter ingelig dat dit ‘n regmatige drie was. Maar die skeidsregter het dit weereens verwerp, en net ‘n strafskop aan Hopefield toegeken.
Die patroon het voortgeduur, met Hopefieldspan wat die doellyn weer oorgesteek het, net om elke keer te sien hoe die skeidsregter die pogings verwerp. In ‘n verrassende wending is ‘n speler van die besoekende span ‘n geelkaart op die doellyn gegee, wat volgens die spelreëls ‘n strafdrie vir Hopefield moes gewees het. Maar die skeidsregter het steeds net ‘n strafdoel toegeken.
In die laaste sekondes van die wedstryd het Hopefield weer probeer en die bal suksesvol gegrond. Maar nogmaals, die skeidsregter het die drie verwerp en eerder ‘n skrum aan Paternoster toegeken. Die besoekende span het voordeel uit die besluit geneem, die bal in aanraking veldop geskop en die skeidsregter het die eindfluitjie geblaas, wat Hopefield se nederlaag bevestig het.
“Ek het gevrees vir my lewe”
Na afloop van die wedstryd het die skeidsregter na bewering aan lede van die Hopefield-span vertel dat hy vir sy lewe gevrees het, ‘n verklaring wat die wenkbroue van beide Hopefield en Paternoster ondersteuners laat lig het. Daar was geen vorige gevalle van geweld teenoor skeidsregters deur Hopefield se aanhangers nie, wat dit moeilik maak om die legitimiteit van die skeidsregter se aanspraak te aanvaar.
Geskiedenis Herhaal Homself
Dit is nie die eerste keer dat so ‘n kontroversie binne die Boland Rugby Unie se geledere plaasgevind het nie. Verlede jaar, tydens die Paastoernooi in Saldanhabaai, het ‘n soortgelyke voorval plaasgevind waar die skeidsregter ‘n duidelike drie van die tuisspan nie erken het nie. Dit het Saldanhabaai die wedstryd gekos, sowel as deurslaggewende punte in die kompetisie.
In daardie geval het die Boland Rugby Unie later die skeidsregter se fout erken, hom geskors en ‘n verskoning aan die verloorspan uitgereik. Maar vir die span was die skade reeds gedoen, en die deurslaggewende punte was verlore.
Boland Rugby Unie het geen aarseling gehad om spanne te disiplineer en swaar boetes op te lê, wanneer skare geweld of wangedrag voorkom nie. Verskeie spanne het skorsings en boetes in die gesig gestaar weens lae skaregedrag. Tog, wanneer skeidsregters twyfelagtige besluite neem, blyk die aanspreeklikheid soms inkonsekwent.
Tyd vir Aanspreeklikheid
Die gebeure van Saterdag se wedstryd het die oproepe vir die Boland Rugby Unie se verantwoordelikheid oor die kwaliteit van hul skeidsregters verskerp. Ondersteuners eis duidelike en konsekwente standaarde: as spanne gestraf word vir wangedrag, moet die Unie dieselfde standaarde vir sy skeidsregters toepas.
CCN sal voortgaan om hierdie storie op te volg en sal die Boland Rugby Unie se reaksie publiseer indien hulle besluit om die saak aan te spreek.
Vir nou wag die mense van Hopefield en die Weskus op antwoorde en geregtigheid vir hul span.
