Reporter – George April
WOLSELEY: – Slegs ’n handjievol vroue het Vrydag by die Wolseley-landdroshof opgedaag vir die borgtog aansoek van Donevin de Goede (20), wat daarvan beskuldig word dat hy die 4-jarige Jade Mars wreed aangerand het.
Die saak is egter uitgestel tot Donderdag, 4 September 2025. Volgens ’n CCN-kontak persoon in Wolseley was dit ’n landdros van ’n ander dorp wat die verrigtinge behartig het. Of dit die rede vir die uitstel was, kon egter nie bevestig word nie.
Inwoners wat wel opgedaag het, het hul teleurstelling uitgespreek oor die swak opkoms. “Mense kla oor die misdaad wat so hoog is, maar wanneer hulle die kans kry om op te staan, dan skitter die gemeenskap in hul afwesigheid. Dié kind kon sy lewe verloor het, en wie weet of dit wel die eerste keer was, dat hy só aangerand was,?” het diè vrou onsteld aan CCN gesê.
Volgens haar was daar ook petisies opgestel om borgtog teen te staan, maar sy is onseker of dit enige effek sal hê. “Dit voel soms of uitlanders meer beskerming kry in hierdie land, as ons eie kinders,” het sy gefrustreerd bygevoeg.
Die Wolseley-gemeenskap staan nou voor ’n belangrike toets: of hulle die hof sal volmaak en ’n sterk boodskap sal stuur wanneer die saak weer op die rol kom. Of as hulle soos Vrydag, sal wegbly en toelaat dat die lae opkoms die stryd teen kindermishandeling sal verswak.
Foto’s – verskaf.
