In ‘n Nasionale Sokkertoernooi
Deur Isaac Cloete
PORT NOLLOTH:- Feesvieringe het die naweek hoogty gevier in die kusdorp Port Nolloth, nadat die plaaslike laerskool, Port Nolloth Primêr, ’n historiese oorwinning behaal het tydens die gesogte Kay Motsepe Skoletoernooi, wat in Kimberley aangebied is.
Die O/13-sokkerspan van die skool het nie net hul teenstanders oortref nie, maar ook die aansienlike kontantprys van R100 000 ingepalm – ’n reusebydrae tot die ontwikkeling van sport by die skool. Die span het die Namakwa-streek met trots verteenwoordig en hul gemeenskap in ekstase gehad met hul prestasie.
Een van die ouers, Bernice de Klerk, het haar vreugde en dankbaarheid gedeel:
“Hierdie is ’n baie groot gebeurtenis vir ons dorpie en die hele streek. Dit word dikwels nie genoegsaam in die media uitgelig nie, en daarom vra ons dat hierdie prestasie wyd bekend gemaak word, ter wille van ons kinders en hul harde werk.”
Die oorwinnaars is op helde-wyse ontvang toe hulle, saam met hul afrigter, Coach Vries, teruggekeer het na die dorpie. Opgewonde ouers en inwoners het hulle verwelkom met dans, gesang en vreugdevolle vieringe.
Volgens inligting het die skoolhoof, mnr. H.M. Klim, die span tydens Maandagoggend se skoolbyeenkoms amptelik vereer vir hul uitsonderlike prestasie.
Die kontantprys van R100 000 sal, volgens ouers en skoolpersoneel, benut word vir die verbetering van sportfasiliteite en verdere ontwikkeling van sport programme aan die skool.
