Verslaggewer – Isaac Cloete
NOORDKAAP:- Op dié stadium lyk dit nie asof die Patriotic Alliance (PA)hulle deur die African National Congress (ANC) gaan laat voorsê nie.
Hierdie afleiding word gemaak nadat beide genoemde politieke partye by die Dawid Kruiper munisipaliteit (DKM), op Upington, basies kop aan kop gekom het in die onlangse plaaslike verkiesing.
Dit het tot samesprekings en samewerking gelei om ’n koalisie te vorm.
Die ANC soek die pos van die burgemeester, maar die PA sien nie kans hiervoor nie. Hulle soek ook hierdie strategiese pos en voer aan dat die ANC nie met so n “red-tape” oor hierdie pos moet kom nie.
“Ons het ons kiesers belowe dat ons na hulle belange sal én moet kyk. “Dus gaan ons nie so maklik afstand doen van hierdie beloftes nie.”
Hierdie verwikkelinge het daartoe gelei dat die Demokratiese Alliansie (DA) en die VryheidsFront Plus VF+ moontlik in n koalisie kan gaan met die PA by die DKM.
Die DA en ANC het beide 14 setels, terwyl die PA vier setels en die VF+ een het. So, indien die PA nie met die ANC n koalisie kan vorm nie, kan die DA en VF+ en die PA met die munisipaliteit wegstap.
Intussen lyk ’n herverkiesing in Upington ook ’n moontlikheid indien genoemde partye nie binne die volgende paar weke tot ’n vergelyk of ooreenkoms kan kom nie.
Die PA en DA gaan na verwagting binnekort ook ‘n sitting het om te kyk of hulle tog kan saamwerk. Die PA het intussen n “koalisie-komitee” van vyf persone in Kaapstad aangestel om namens hulle te onderhandel oor koalisie-vormings in die Noord-Kaap en ander provinsies.
Alhoewel die president van die PA, Gayton McKenzie, vroeër slegs genoem het dat die PA waarskynlik met die ANC in die bed gaan spring by die DKM, lyk dit tog dat die PA nou na hulle kiesers se oproepe en voorkeure gaan luister. Tydens ‘n “live”-gesprek met PA-lede en kiesers op sosiale media het McKenzie bevestig dat hy eerder in die opposisiebanke gaan sit as om voor die ANC se eise te swig.
Hy het ten laaste sy kiesers en lede versoek om eerder reg te wees vir n herverkiesing in die Upington-area.
Foto – verskaf