Met Soutsuur by ‘n Slagtery in Mitchells Plain
Berig – George April
MITCHELLS PLAIN:- ’n 17-jarige seun is in die hospitaal opgeneem, nadat hy glo deur iemand aangespoor is om ’n bottel vloeistof te drink, wat later as suur geïdentifiseer is. 
Die voorval het Sondag, 11 Mei 2025, by ’n plaaslike slagtery in Mitchells Plain plaasgevind.
Polisiewoordvoerder, sersant Anelisiwe Manyana, sê Lentegeur-polisie het ’n poging tot moordsaak geopen, ná die voorval wat omstreeks 12:20 die middag plaasgevind het. “Die tiener is glo aangemoedig om vloeistof uit ’n koeldrankbottel op die perseel te drink. Hy het daarna begin kramp en opgooi en is na ’n mediese fasiliteit geneem vir behandeling,” het Manyana gesê.
Die voorval is eers die volgende dag deur ’n familielid by die polisie aangemeld. “Die slagtery is intussen deur die owerhede gesluit hangende verdere ondersoek. Geen arrestasies is tot dusver gemaak nie,” het Manyana bevestig.
Op hierdie stadium is dit nog nie duidelik wie verantwoordelik was vir die beweerde grap nie, en niemand is nog in hegtenis geneem nie.
Die ondersoek duur voort.
