Moordenaar 15 Jaar Tronkstraf vir Moord.
Verslaggewer – Isaac Cloete
Springbok:- Die gemeenskap van Klipfontein dra steeds swaar na die skok en hartseer oor die wrede moord op 39-jarige Quinton Makatees.
Dinsdag is die dader, Juandre Smith (25), in die Garies Streekhof tot 15 jaar direkte gevangenisstraf gevonnis.
Die tragiese voorval het op 26 Junie 2024 plaasgevind. Smith en Makatees het saam by ’n huis in Klipfontein gedrink toe ’n rusie uitgebreek het. Makatees het huis toe vertrek, maar is deur Smith agternagesit en met ’n skroewedraaier noodlottig gesteek.
Die vonnis bring wel ’n mate van geregtigheid, maar vir die familie en geliefdes van Makatees bly die verlies ondraaglik. “Ons het nie net ’n broer en seun verloor nie, maar ’n mens met ’n groot hart,” het ’n familielid ná die uitspraak gesê.
Volgens die Namakwa-distriks kommissaris, brigadier Schalk Andrews, wys hierdie saak dat geweldsmisdade verwoestende gevolge het vir families en gemeenskappe. “Geen vonnis kan die pyn van ’n gesin verlig nie, maar ons polisiebeamptes sal aanhou veg dat geregtigheid geskied,” het hy benadruk.
Die deeglike speurwerk van sersant Garth Klaase en die vasberadenheid van staatsaanklaer Basil “The Jaguar” Kock is deur die hof en gemeenskap geloof.
Die gemeenskap van Klipfontein hoop dat die vonnis nie net afsluiting bring nie, maar ook ’n waarskuwing sal wees dat geweld nie ’n oplossing is nie.
Navrae:
Kaptein Ivan Magerman
SAPS Korporatiewe Kommunikasie en Skakeling – Namakwa Distrik
083 478 9317 – MagermanIC@saps.gov.za
Foto – Staatsaanklaer – Basil “The Jaguar” Kock en Sersant Garth Klasse – Ondersoekbeampte.
