Verslaggewer – Felicity Jooste
MITCHELLS PLAIN:- ’N gewone Woensdagoggend het in chaos ontaard toe lede van die Nasionale Intervensie-Eenheid op gewapende verdagtes afgekom het, wat glo vanaf Nyanga na Mitchells Plain beweeg het.
Volgens betroubare bronne het die polisie ’n Toyota Hilux-bakkie dopgehou nadat inligting ontvang is dat ’n groep swaar gewapende mans daarin rondbeweeg. Die verdagtes het die polisievoertuig op Jakes Gerwel-rylaan opgemerk en onmiddellik op die beamptes begin skiet.
Polisiebeamptes het teruggevuur. Een verdagte is op die toneel noodlottig gewond, terwyl vier ander, tussen 27 en 45 jaar oud, in hegtenis geneem is.
Tydens die arrestasie is ’n AK47-aanvalsgeweer, twee 9mm-pistole, en ’n groot hoeveelheid ammunisie op die toneel gekonfiskeer. Die Toyota Hilux het ook met twee privaatvoertuie gebots tydens die poging om te vlug, wat geringe skade veroorsaak het.
Die Onafhanklike Polisiedirektoraat (OPOD/IPID) ondersoek tans die omstandighede rondom die dood van die gesneuwelde verdagte. Die vier oorblywende verdagtes word in aanhouding gehou en sal binnekort in die landdroshof in Mitchells Plain verskyn op aanklagte wat wissel van poging tot moord, die besit van onwettige vuurwapens, tot die aanval op polisielede.
Die polisie het die publiek bedank vir hul vinnige samewerking en versoek dat enige verdere inligting met ondersoekbeamptes gedeel word.