Oor ANC-kaderontplooiing
Berig – George April
PRETORIA:-Die Hooggeregshof in Pretoria het die Demokratiese Alliansie(DA) se aansoek om verlof tot appèl, Woensdag 7 Mei van die hand gewys.
Dit ná die DA se mislukte poging vroeër vanjaar, om die African National Congress (ANC) se kader ontplooiings beleid ongrondwetlik te laat verklaar.
Die hof het bevind dat die DA se appèl “geen redelike vooruitsig op sukses” het nie en dat daar geen dwingende rede bestaan waarom die saak hersien moet word nie. Die DA het aangevoer dat die ANC se beleid dienslewering benadeel en bots met die Grondwet, spesifiek artikel 197(3), wat bepaal dat staatsamptenare nie bevoordeel of benadeel mag word op grond van politieke oortuigings nie.
Volgens die hof het die DA egter nie daarin geslaag om spesifieke grondwetlike oortredings binne die beleid aan te dui nie, en is hul saak op veronderstellings gebaseer. Die oorspronklike uitspraak waarin die DA se aansoek verwerp is, is op 21 Februarie 2024 gelewer.
Die ANC het die jongste beslissing verwelkom en aangedui dat hulle voortgaan met hul beleid om bekwame en lojale kaders in sleutelposte aan te stel.
Die DA het nognie aangekondig of hulle verdere regsaksie gaan oorweeg nie.
