Berig – George April
Table View:- ’n Groot verrassing het Dinsdagoggend op die polisie gewag, toe hulle in Parklands op ‘n huis toegeslaan het.
‘N arrestasie het plaasgevind, nadat lede van die Provinsiale Operasionele Bevelsentrum inligting ontvang het oor moontlike dwelm aktiwiteite in die area.
Die polisie het by ‘n huis in Holly Crescent, Table View, opgedaag en die woning deursoek. Tot hul verbasing het hulle ‘n groot hoeveelheid kontant gevind. Meer as R1 miljoen, in Suid-Afrikaanse én buitelandse geldeenheid. Verder het hulle ook ‘n sak vol bankkaarte gevind, wat aan verskeie mense behoort.
Die mense in die huis kon nie verduidelik hoekom hulle al die kontant en kaarte gehad het nie. Die 38-jarige buitelandse man is onmiddellik gearresteer. Hy word verdink van die besit van gesteelde goedere en moontlike betrokkenheid by kubermisdaad.
Hy sal Donderdag, 15 Mei, in die Kaapstadse Landdroshof verskyn. Intussen neem speurders van die provinsiale eenheid vir georganiseerde en kommersiële misdaad die ondersoek verder. Daar kan dalk nog aanklagte bykom soos die ondersoek vorder.
Die polisie het weereens hul vasberadenheid gewys om misdaad in ons gemeenskappe hok te slaan, en vra dat mense aanhou om verdagte aktiwiteite aan te meld.
