13-Jarige Seun Gewond
Mitchells Plain:- Twee mans is Sondagmiddag in aparte skietvoorvalle in Mitchells Plain doodgeskiet, terwyl ’n 13-jarige seun gewond is.
Die eerste voorval het ongeveer 14:30 op die hoek van Metropolitan- en Trampolienstraat in Beaconvallei plaasgevind. ’n 34-jarige man is daar met veelvuldige skietwonde op die grond gevind. Nooddienste het hom op die toneel dood verklaar. Die polisie het ’n moordondersoek ingestel, en die verdagte of verdagtes is steeds op vrye voet.
Net 15 minute later, omstreeks 14:45, het nóg ’n skietvoorval in Moloposingel, Portlands, plaasgevind. Hier is ’n 26-jarige man noodlottig gewond en op die toneel dood verklaar. ’n 13-jarige seun is tydens dieselfde voorval raakgeskiet en na ’n hospitaal geneem vir mediese behandeling.
Volgens die polisie het die verdagtes van die toneel gevlug, en niemand is nog in hegtenis geneem nie. Die motief agter albei skietvoorvalle is nog onbekend en vorm deel van die ondersoek.
Owerhede doen ’n beroep op enigiemand met inligting om Crime Stop by 08600 10111 te kontak of die MySAPS-toepassing te gebruik om anonieme wenke deur te gee.
