Man in Kritieke Toestand
Berig – George April
Malmesbury:- ‘N 24-jarige man is Saterdagaand ernstig beseer in ‘n voorval wat hom op Vinkstraat in Malmesbury afgespeel het.
Volgens berigte is die man drie keer gesteek, glo deur sy meisie, haar vriendin en haar tannie ná ‘n rusie tussen hom en sy meisie uitgebreek het.
Bronne naby die toneel beweer die man was onder die invloed van alkohol en het glo aggressief begin raak, waarna die drie vroue na bewering teruggekap het. Die man is glo twee keer met ‘n mes gesteek, en een keer met ‘n stukkende bottel.
Hy is in ‘n kritieke toestand na Tygerberg Hospitaal vervoer, waar hy tans onder intensiewe sorg is.
Tot op hede is geen arrestasies gemaak nie, maar die polisie ondersoek die voorval.
Op sosiale media is verskeie menings gedeel oor die insident. Sommige gebruikers meen die vroue het net hulself verdedig teen die man se aggressie, terwyl ander vra dat geregtigheid moet geskied vir die ernstige beserings wat hy opgedoen het.
“Ons het dit hoor gebeur, dit was chaos. Ek hoop almal praat die waarheid, want iemand kon dood gewees het,” het ‘n inwoner op Facebook geskryf.
Die gemeenskap wag nou gespanne op verdere inligting van die owerhede.
