Berig – Fecity Jooste
PHILIPPI:– Die Onafhanklike Polisie-ondersoek direktoraat (IPID) ondersoek tans ’n dodelike skietvoorval waarin drie vermeende kapers Dinsdagaand in die Kosovo-nedersetting in Philippi deur polisie doodgeskiet is.
Volgens die polisie is die verdagtes laat die aand opgespoor, enkele ure nadat die liggaam van ’n onbekende vrou in ’n gekaapte voertuig in Nyanga gevind is.
Nyanga SAPD het omstreeks 20:30 op ’n moordtoneel in Klipfonteinweg, Old Crossroads, gereageer. Daar is die liggaam van ’n vroulike passasier agter in ’n wit Toyota Rumion gevind – sy is in die mond geskiet.
Die eienaar van die voertuig het aan polisie bevestig dat sy bestuurder vroeër die aand deur vyf gewapende mans naby die Philippi-Oos polisiestasie gekaap is. Die bestuurder is uit die motor gegooi, terwyl die kapers met die vroulike passasier binne, weggejaag het.
Die geskokte bestuurder het daarin geslaag om ’n Amaphela-taxi te stop en is so na die voertuig se eienaar geneem om hulp te kry. Kort daarna het polisie die verdagtes in Philippi vasgetrek waar ’n skietgeveg uitgebreek het. Drie van die vermeende kapers is noodlottig gewond.
IPID sal nou ondersoek instel na die omstandighede rondom die skietery.