Eggenoot beweer afpersing het moord voorafgegaan
CCN verslaggewer – Felicity Jooste
KAAPSTAD:- ‘N gesin van Woodstock is in rou gedompel nadat ‘n 37-jarige vrou Saterdagoggend koelbloedig doodgeskiet is.
Volgens polisiewoordvoerder konstabel Ndakhe Gwala het die voorval omstreeks 07:03 op Saterdag, 27 Junie 2026, in Aberdeenstraat plaasgevind.
“Volgens berigte het die oorledene voor ‘n openbare toilet gestaan toe ‘n onbekende man haar genader en vir ‘n paar minute met haar gepraat het. Die verdagte het daarna ‘n vuurwapen uitgehaal en haar een keer in die gesig geskiet,” het Gwala gesê.
Mediese personeel het die vrou op die toneel dood verklaar. Die verdagte het glo daarna na Victoriastraat gevlug, in ‘n minibus-taxi geklim en van die toneel weggejaag.
Die oorledene, Hadiha Henderson (37), laat haar eggenoot en twee kinders, onderskeidelik 22 en 15 jaar oud, agter.
Haar eggenoot het aan die Daily Voice beweer dat hulle vir ‘n geruime tyd deur vermeende bendelede afgepers is.
Hy beweer die gesin is gedreig dat hulle vermoor sou word indien hulle nie geld betaal nie. Hierdie bewerings is nie deur die polisie bevestig nie en vorm deel van die ondersoek.
Woodstock-polisie ondersoek ‘n saak van moord. Niemand is teen die tyd van publikasie in hegtenis geneem nie.
Enigiemand met inligting wat die ondersoek kan help, word versoek om die polisie te kontak of anoniem inligting deur Crime Stop deur te gee.
