Tydens Gewapende Rooftog in Delft
Kaapstad:- ’N 19-jarige jongman is Sondagaand tragies doodgeskiet tydens ’n gewapende rooftog by sy familie se huis in Drakensbergstraat, N2 Gateway, Delft.
Volgens vroeë verslae was die jongman se pa, ’n plaaslike taxi-eienaar, glo die teiken van die aanval toe hy omstreeks 20:50 by hul woning aangekom het.
Polisiewoordvoerder, Kaptein FC Van Wyk, het bevestig dat twee gewapende mans die erf binnegedring het, net nadat die vader geparkeer het. Die aanvallers het hom met vuurwapens gedreig en sy wapen en ander besittings geëis.
Kort daarna het skote geklap.
Toe die pa weer binne die huis gaan kyk, het hy sy seun en vrou in bloed gevind, met die verdagtes wat met ’n onbekende bedrag kontant gevlug het. Die 19-jarige is op die toneel dood verklaar met ’n skietwond aan die kop. Sy 56-jarige ma is met ’n skietwond na ’n hospitaal gehaas, maar die pa is ongedeerd.
Polisie ondersoek die voorval as ’n rooftog en geen arrestasies is nog gemaak nie.
Bure is diep geskok oor die gebeure. “Hy was ’n stil en ordentlike seun, ons harte is seer vir hierdie familie,” het ’n buurvrou, mev. Thandi Jacobs, gesê.
’n Familielid, wat anoniem wil bly, het bygevoeg: “Ons verstaan nie hoekom so iets moes gebeur nie, hy het net probeer help toe hy sy ma hoor gil het. Nou is hy weg.”
Die polisie doen ’n beroep op enigeen met inligting om Crime Stop te kontak by 08600 10111.
— CCN Nuusspan
