Verslaggewer – Felicity Jooste
Lavender Hil:- ’n Skokkende skietvoorval in Lavender Hill op Dinsdagaand, het die kwesbaarheid van wetstoepassers en die groeiende vloei van onwettige vuurwapens op die Kaapse Vlakte opnuut onder die soeklig geplaas.
Volgens die polisie is twee lede van die teenbende-eenheid (Anti-Gang Unit) geskiet en gewond toe hulle ’n voertuig agternagesit het. Die voorval het omstreeks 18:25 in Mirbyweg plaasgevind toe ’n polisiekaptein en ’n sersant die voertuig tot stilstand gebring het. Skielik het onbekende aanvallers uit die gemeenskap op hulle begin skiet.
Die twee beamptes is in ’n mediese fasiliteit opgeneem vir behandeling en geen arrestasies is nog gemaak nie.
Die voorval het groot kommer ontlok oor die feit dat gewere en ander vuurwapens al hoe makliker in gemeenskappe soos Lavender Hill, Steenberg en ander gebiede op die Kaapse Vlakte beskikbaar is. “Die vraag is: wat gebeur met al die wapens wat die polisie konfiskeer? Hoekom bly nuwe wapens elke week weer op straat uitkom?” vra ’n bekommerde inwoner.
Gewelddadige bende-aktiwiteite en maklike toegang tot wapens maak dit toenemend gevaarlik vir beide gemeenskappe én diegene wat hulle moet beskerm. Kenners waarsku dat georganiseerde kriminele netwerke en korrupsie ’n groot rol speel in die voortdurende vloei van vuurwapens na bendes.
Die polisie doen ’n beroep op enigiemand met inligting oor die skietery om Crime Stop te kontak by 08600 10111 of die MySAPS-toepassing te gebruik. Alle inligting kan anoniem verskaf word.
Hierdie insident is ’n harde herinnering dat as gemeenskappe nie wetstoepassing ondersteun nie, die misdadigers sterker word en almal is uiteindelik in gevaar.
