Ná Vuurwapen – en Ammunisie Inhegtenisneming
Verslaggewer – Felicity Jooste
Villiersdorp:- Die waaksaamheid van lede van die Villiersdorp Misdaad voorkomingseenheid, het Vrydagmiddag gelei tot die arrestasie van vier mans en ’n vrou, nadat ’n ongelisensieerde vuurwapen en ammunisie in hul besit gevind is.
Volgens polisiewoordvoerder was lede van die eenheid besig met misdaadvoorkomings patrollies, toe hulle ’n voertuig teen ’n hoë spoed op die R321-pad opmerk. Die voertuig is gevolg en tot stilstand gedwing. Tydens die deursoeking van die voertuig en die insittendes, het beamptes ’n 9mm-pistool met 23 patrone in die kattebak ontdek.
Die verdagtes is onmiddellik in hegtenis geneem en het vanoggend in die Caledon-landdroshof verskyn, op aanklagte van die besit van ’n ongelisensieerde vuurwapen en ammunisie.
In ’n onverwante voorval is ’n 21-jarige man Vrydagaand deur lede van die Anti-Bendes-eenheid in hegtenis geneem, nadat hulle ’n 9mm-pistool en ammunisie in ’n sak binne ’n informele woning in Mountain Road, Overcome Heights gevind het.
Die jong man staan tereg op aanklagte van die onwettige besit van ’n vuurwapen en ammunisie en sou na verwagting vandag in die Muizenberg-landdroshof verskyn het.
SAPD het die publiek bedank vir hul voortdurende samewerking en het herhaal dat hulle vasbeslote bly om onwettige wapens van die strate te verwyder.
#GunsOffTheStreets #VisiblePolicing #Villiersdorp