Verslaggewer – Isaac Cloete
Springbok:- Lede van die Suid-Afrikaanse Polisiediens (SAPD) in Springbok het ’n 25-jarige vrou in hegtenis geneem, in verband met dwelmhandel, ná ’n intelligensiegedrewe operasie.
Volgens polisie-inligting is daar op Vrydag, omstreeks 12:00 berig ontvang oor beweerde dwelmverwante aktiwiteite, insluitend ’n aflewering wat na bewering in die parkeerarea van ’n winkelsentrum in Springbok sou plaasvind.
Polisielede het onmiddellik op die inligting gereageer en na die betrokke parkeerarea gegaan, waar die verdagte geïdentifiseer en genader is. Tydens ’n deursoeking is vermeende metakwaloon-tablette en metamfetamien (tik) in haar besit gevind.
Die verdagte het daarna met die polisie saamgewerk en hulle na haar woning in Nababeep geneem, waar ’n deursoeking met haar toestemming uitgevoer is. Tydens dié soektog is verdere metakwaloon-tablette op die perseel gevind.
In totaal het die polisie ’n beduidende hoeveelheid vermeende metakwaloon-tablette met ’n geskatte straatwaarde van R29 940, asook metamfetamien (tik) met ’n geskatte straatwaarde van R15 000, beslag gelê.
Die verdagte is in hegtenis geneem en van dwelmhandel aangekla. Sy sal na verwagting binnekort in die hof verskyn.
Die Namakwa-distrikskommissaris, brigadier Schalk Andrews, het die betrokke lede geloof vir hul waaksaamheid en toewyding in die stryd teen onwettige dwelms in die gemeenskap.
Die SAPD bly verbind tot die bekamping van dwelmverwante misdaad in die distrik en doen ’n beroep op gemeenskapslede om voort te gaan om inligting te verskaf wat kan help in die stryd teen misdaad.
Navrae:
Kaptein Ivan Magerman
SAPD Namakwa Kommunikasiebeampte
083 478 9317