Kommer oor Veiligheid op dié betrokke Pad
Verslaggewer – Isaac Cloete
SPRINGBOK:- Die skielike en tragiese dood van twee geliefde polisiebeamptes het skokgolwe deur verskeie gemeenskappe in Namakwaland gestuur.
Kaptein Edward Saal (57) en sy vrou, kaptein Liezel Saal, is Maandagoggend oorlede ná ’n ernstige motorongeluk op die Piekenierskloof Pass, tussen Piketberg en Eendekuil.
Volgens ’n amptelike polisieverklaring is dit “met groot hartseer” dat die afsterwe van die twee beamptes bevestig is.
Kaptein Saal was ten tyde van sy dood verbonde aan die Springbok-hof, terwyl sy vrou in die Menslike Hulpbronbestuur-afdeling in Springbok werksaam was.
Volgens beskikbare inligting was die egpaar op pad na Kaapstad om hul huweliksherdenking te vier, toe die voertuig waarin hulle gereis het vermoedelik ’n band gebars het. Kaptein Saal is op die toneel dood verklaar, terwyl mev. Saal ernstig beseer na die hospitaal geneem is, waar sy later aan haar beserings beswyk het.
Plaaslike aktivis Billy Claasen het bevestig dat die ongeluk naby Goedemanskraal, oorkant Eendekuil, plaasgevind het. Hy het ook motoriste gemaan om versigtig te wees, aangesien daar tans verskeie padwerke in die gebied aan die gang is.
Die egpaar het in Nababeep, naby Springbok, gewoon, waar hul afsterwe veral diep gevoel word. Gemeenskapslede beskryf kaptein Saal as ’n saggeaarde en toegewyde beampte wat sy werk met trots en oorgawe verrig het.
Die Saal-egpaar word onthou as vriendelike en respekvolle lede van die Suid-Afrikaanse Polisiediens, en hul heengaan laat ’n groot leemte in beide hul werksplek en gemeenskap.
Die voorval het opnuut vrae laat ontstaan oor padveiligheid op dié roete, waar padwerke en veranderende toestande reeds kommer onder motoriste wek.
