Winterreën Bly Uit
CCN Verslaggewer – George April
Hopefield:- Alhoewel die nagte op die Weskus tans bitter koud is, is die dae al opvallend warm, en die winterreën wat die streek so broodnodig het, bly grootliks uit.
Van Vredendal, Vanrhynsdorp en Klawer in die Matzikama-gebied, tot Clanwilliam, Citrusdal en Lambertsbaai in die Cederberg, Piketberg, Porterville en Velddrif in Bergrivier, Saldanha, Vredenburg, Langebaan en Hopefield in die Saldanhabaai-munisipaliteit, én Malmesbury, Moorreesburg, Darling en Riebeek-Kasteel in die Swartland, is die boodskap dieselfde: hierdie winter is tot dusver droog.
Na die swaar reën in Mei, wat baie damme (veral Clanwilliamdam) goed gevul het, het Junie en Julie feitlik geen betekenisvolle reënval gebring nie. Dit is presies die maande wanneer die Weskus se winterreënval normaalweg sy piek bereik.
Die Wes-Kaap het voor die herfsreën van vanjaar nog onder die nagevolge van ’n lang droogte gebuk gegaan. Al is die damvlakke tans redelik gesond danksy daardie Mei-stortreën, is die grondwater en die lande se vogstatus ’n ander storie. Boere in die Swartland en op die Weskus se droëland-graangebiede voel dit reeds.
Met die lang somermaande wat voorlê, kan water weer ’n krisis raak. Dit is nie ’n oordrywing nie – dit is ’n realiteit wat die streek al vantevore deurgemaak het. Inwoners word dus ernstig aangeraai om water spaarsaam te gebruik. Elke druppel wat nou gespaar word, is ’n druppel wat in die somer beskikbaar sal wees.
Die Weskus kan nie bekostig om te wag tot die krane begin droog loop nie – Die tyd om te spaar, is nou.
