Berig – George April
GENADENDAL – Die gemeenskap van Nuwe Uitbreiding in Genadendal is in skok ná die dood van 36-jarige Reagan Arendse, wat na bewering ná ‘n polisie-aanhouding in Junie aan sy beserings beswyk het.
Volgens die familie en gemeenskapsleiers is Arendse op Donderdag 6 Junie by ’n vriend se huis deur plaaslike polisielede gearresteer, ná hy glo verbind is met ’n diefstalsaak. Die polisie het hom glo onder ‘n bed gevind, waar hy weggekruip het, waarna hulle hom uitgetrek en glo ernstig aangerand het, met vuiste, skoppe en knuppels.
Hy is later na die Genadendal-polisiestasie geneem, waar hy bewusteloos gebly het ondanks pogings om hom met ’n tuinslang wakker te kry. Dié onmenslike behandeling het groot woede in die gemeenskap ontketen.
Arendse is eers omstreeks 19:20 per ambulans na Caledon-hospitaal vervoer, en later na Tygerberg-hospitaal oorgeplaas. Ná bykans drie weke in die hospitaal is sy familie op 25 Junie meegedeel dat daar niks meer gedoen kon word nie. Hy is op 27 Junie oorlede, ironies genoeg op sy pa, Victor Viljoen (56) se verjaarsdag.
“Hy was weerloos. Hy kon nie eet of self skoonmaak nie, en het doeke gedra. Ons het altyd met die polisie saamgewerk, maar hierdie keer het hulle hom doodgemaak,” sê sy hartseer moeder, Rolien Viljoen (55), wat ook onthul dat Arendse reeds voorheen aangerand is deur dieselfde beamptes, wat tot epileptiese aanvalle gelei het.
John Michels, streekleier van die NCC (Neighbourhood Community Council) in die Overberg, het bevestig dat klagtes oor polisiewreedheid al sedert Januarie teen die Genadendal-stasie ingedien is. “Ons het gewaarsku iemand gaan dood, nou het dit gebeur. Dié beamptes moet tronk toe en die stasiebevelvoerder moet afgedank word,” het hy gesê.
Die gemeenskap beplan om regstappe te neem, en ‘n versoekskrif vir geregtigheid word reeds opgestel. Ondersoeke deur die onafhanklike polisie-ondersoekdirektoraat (IPID) sal glo volg.
