Vyf dood in nuwe golf van bendegeweld
Verslaggewer – Felicity Jooste
Kaapstad:- Die Kaapse Vlakte is weer oorval deur ’n vlaag van dodelike bendegeweld wat nie meer as “normaal” afgemaak kan word nie.
Sedert Saterdag is vyf mense dood en verskeie gewond in Steenberg en Retreat, en plaaslike bronne waarsku dat die geweld vinnig na ander gebiede versprei.
Op Saterdag en Sondag het twee mans in afsonderlike voorvalle gesterf.
Maandagmiddag is ’n 17-jarige tiener in Beethovenstraat, Retreat, noodlottig getref toe gewapende aanvallers uit ’n Datsun Go op hom en sy vriende losgebrand het. Twee jong mans in hul twintigs is gewond.
Net ’n paar uur later is nóg twee slagoffers, 24 en 37 jaar oud, doodgeskiet in Fluitstraat, Steenberg toe ’n wit voertuig langs hulle stilhou en die insittendes op hulle begin skiet het.
Polisiewoordvoerder Wesley Twigg sê die ondersoek na al vyf moorde duur voort, maar tot dusver is niemand in hegtenis geneem nie.
Volgens plaaslike veiligheidsbronne hou die voorvalle verband met inwendige gevegte binne die Junky Funkies-bende, wat ook al verskeie dodelike skietvoorvalle in Vrygrond en omliggende gebiede veroorsaak het.
Gemeenskapsleiers sê inwoners leef in ’n klimaat van vrees en trauma.
“Ons kinders groei groot tussen koeëls. Dis nie normaal dat ons elke dag van dood en geweld moet hoor nie,” sê ’n gemeenskapslid van Retreat.
“Die hele Kaapse Vlakte brand. Vandag is dit Steenberg, gister was dit Vrygrond, môre dalk Mitchells Plain of Hanover Park. Dit voel soos ’n oorlog en ons mense is die slagoffers,” waarsku ’n aktivis van Lavender Hill.
Die geweld beklemtoon weer die roep van inwoners vir sterker polisie-teenwoordigheid en duidelike planne van die regering om die Kaapse Vlakte se bendeprobleem daadwerklik aan te pak.
