Verslaggewer – George April
KAAPSTAD:- ’N stapper het Donderdagoggend, tragies gesterf nadat hy van een van die staproetes op Lion’s Head in die Table Mountain Nasionale Park geval het.
Volgens Suid-Afrikaanse Nasionale Parke (SANParke) is nooddienste kort ná die voorval ontbied, waarna ’n reddingspan onmiddellik na die toneel ontplooi is.“Ten spyte van die vinnige reaksie en pogings van alle rolspelers, is die stapper ongelukkig op die toneel dood verklaar,” het SANParke in ’n verklaring gesê.
Die voorval is daarna aan die Suid-Afrikaanse Polisiediens oorhandig vir verdere ondersoek.
Polisiewoordvoerder, sersant Wesley Twigg, het bevestig dat ’n geregtelike doodsondersoek by die Kaapstad Sentraal-polisiestasie geopen is.
“’n Geregtelike ondersoek is geregistreer ná die voorval wat ’n manlike Duitse burger behels. Die omstandighede rondom die insident word tans ondersoek, en ’n nadoodse ondersoek sal gedoen word om die oorsaak van dood te bepaal,” het Twigg gesê.
Lion’s Head is ’n gewilde staproete, veral gedurende die feestyd, en lok daagliks groot getalle plaaslike en internasionale besoekers. Owerhede het reeds herhaaldelik stappers gemaan om versigtig te wees, veiligheidsriglyne te volg en nie alleen of onvoorbereid die roetes aan te pak nie.
Die ondersoek duur voort.
