29 Verdagtes Vasgetrek
Berig – George April
Philippi:- ‘N Gesamentlike operasie onder leiding van brigadier Heidi Mong-Jonker, provinsiale bevelvoerder vir Algemene Ondersoeke, het Woensdag groot sukses behaal as deel van die lopende #OperationBasadi-inisiatief.
’n Multi-dissiplinêre span bestaande uit Provinsiale Speurders, Philippi SAPD en Kaapstad se Wetstoepassingsagentskappe het 96 adresse besoek tydens ’n intensiewe nasporingsaksie. Die resultaat: 29 verdagtes is in hegtenis geneem vir uiteenlopende misdrywe – die meerderheid verbandhoudend met geslagsgebaseerde geweld (GBV).
Onder die aanklagte tel moord, verkragting, aanranding met die doel om ernstige liggaamlike beserings toe te dien (GBH), gewone aanranding, opsetlike saakbeskadiging, huisgeweld, diefstal, huisbraak, die wys van ’n vuurwapen, crimen injuria, intimidasie en die besit van tik.
Die meeste van die aangeklaagdes het reeds Donderdag, 7 Augustus 2025, in verskeie landdroshowe regoor die Metropool verskyn.
Provinsiale bestuur het die vroulike beamptes wat hierdie aksies lei, geloof vir hul toewyding en ywer om veiliger gemeenskappe te skep. Soortgelyke operasies sal dwarsdeur Vrouemaand voortgesit word, met die fokus daarop om vroue aan die voorpunt van wetstoepassing te plaas.
